Monitores ao servizo da campaña da reciclaxe serán os encargados de transmitir aos visitantes a importancia que ten a correcta xestión do lixo que producimos a diario nos fogares e na que o cidadán cumpre un papel fundamental, xa que nas súas mans reside a posibilidade de previr a xeración de residuos
“Separemos ben, reciclaremos mellor” 2014-2015, unha iniciativa educativa promovida pola Consellería de Medio Ambiente e Sogama co obxectivo de concienciar e sensibilizar á poboación en torno á xestión sostible dos residuos urbanos e a importancia da súa colaboración no sistema, chegará o próximo día 29 á Aula da Natureza Río Miño a fin de levar a súa mensaxe aos escolares convocados para participar nas actividades deseñadas no marco desta iniciativa. Alí estará entre as 10:00 e as 13:00 horas.
E é que o Aula da Natureza, sita no Paseo Fluvial de Oira, constitúe un instrumento para dar a coñecer á poboación, dunha forma amena e comprensible, os valores naturais, sociais, históricos e culturais que esconde o ecosistema do río Miño, ampliando deste xeito o coñecemento da súa contorna e promovendo condutas de respecto e conservación da mesma.
O espazo divídese en dúas plantas nas que se representa a exposición interpretativa do Miño con 14 paneis, unha maqueta do tramo do río ao seu paso por Ourense, unha maqueta do muíño de «Acea» e unha guía do itinerario onde se explica de forma detallada todas as cuestións vinculadas a este ámbito natural.
ORGANIZACIÓN E INTERESE, OS PRINCIPAIS VALORES
Monitores ao servizo da campaña da reciclaxe serán os encargados de transmitir aos visitantes a importancia que ten a correcta xestión do lixo que producimos a diario nos fogares e na que o cidadán cumpre un papel fundamental, xa que nas súas mans reside a posibilidade de previr a xeración de residuos, a través de prácticas de consumo responsable, de aproveitar ao máximo os produtos mediante a reutilización, e de separalos convenientemente para depositalos nos diferentes contedores habilitados nas vías públicas: amarelo, para os envases de plástico, latas e briks; azul, para os envases de cartón e papel; iglú verde, para os de vidro; contedor específico para pilas; e verde convencional, para a fracción resto, que Sogama logra transformar, coas mellores tecnoloxías dispoñibles, en electricidade, levando a cabo unha actividade absolutamente respectuosa co medio ambiente e a saúde pública.
Pero, máis aló das explicacións impartidas, os pequenos terán a oportunidade de participar no xogo xigante da reciclaxe, un dispositivo pedagóxico do que tamén poden facer uso os adultos e que permite poñer a proba os coñecementos adquiridos e interiorizar novos conceptos que, sen dúbida, lles resultarán de gran axuda no seu labor ecolóxico.
Todos os alí presentes serán obsequiados con material divulgativo e didáctico que lles servirá de apoio e guía para mellorar a súa colaboración no sistema de recollida selectiva e incluso para exercer unha función educativa no seu eido familiar.
A terceira edición de “Separemos ben, reciclaremos mellor”, que estará en vigor durante un ano, conta co respaldo de Ecoembes, Ecovidrio e os sistemas integrados de xestión de pilas: Ecopilas, Ecolec e ERP.
